(1927) La confesión d’una neña
Mire, siñor Cura, tengo
mu tranquila la concencia,
y, porque de mi marmuren,
non crea que me da pena.
Voi cunta–ylo. Mui temprano,
el domingo de la fiesta,
salí de casa pa dir
polos enriedos; la cesta
bailaba ¡así Dios me salve!
enriba de la rodiella
P’atayar, baxé pol prau,
y al saltar la saltadera,
vilu venir, ¡qué güen mozu!
delantre de la parexa.
El non me via a min; traía
sobre un hombru la chaqueta,.
La camisa, muy blanquina,
como el piscuezu–y apreta,
dexóla desabrochá
pa qu’ansí, la nuez fixera
golgoritos al cantar
aquella voz sana, fresca,
como la de una calandria
qu’a sentir celu escomienza.
Cuando–y pude ver los güeyos,
un pocoñín más de cerca,
¡por poques caigo en bardial!
¡díbaseme la cabeza!
¡Qué carina! ¡Qué bigote
fechu con filos de seda!
Al allegar a mio llau
cantó: “Diz la mio morena
que me quier más qu’a delgunu”.
Miró pa la saltadera
y apreguntóme: ¿Verdá?
Púnxeme na carretera
d’un blincu. Quixe deci–y:
¡Sí, quierte la to morena!
Pero, ¡non pude! El gañote
empapiellóme la llengua.
Cogílu entós pol piscuezu,
baxé–y p’acá la cabeza,
y por no poder falar,
di–y un besu....................
Sí, vergüenza,
tien que me dar el cuntalo,
pero… la verdá non ye esa.
¡Yo, señor, no lu besé!
¡Lo que–y di, jue...la rispuesta!...